𝗜𝗿𝗲𝗼 𝘁𝗲𝗯𝗼𝗸𝗮 𝗻𝗶𝘀𝗼𝗻𝗴𝗮𝗱𝗶𝗻𝗮 𝗻𝗮𝗻𝗱𝗿𝗮𝗶𝘀𝗮𝗻’𝗻𝘆 𝗠𝗶𝗻𝗶𝘀𝗶𝘁𝗿𝘆 𝗻𝘆 𝗙𝗮𝗺𝗽𝗶𝗿𝗼𝗯𝗼𝗿𝗼𝗯𝗼𝗮𝗻𝗮 𝗻𝘆 𝗜𝗻𝗱𝗼𝘀𝘁𝗿𝗶𝗮 𝘀𝘆 𝗻𝘆 𝗙𝗮𝗺𝗽𝗶𝘃𝗲𝗹𝗮𝗿𝗮𝗻𝗮 𝗻𝘆 𝗦𝗲𝗵𝗮𝘁𝗿𝗮 𝘁𝘀𝘆 𝗠𝗶𝗮𝗻𝗸𝗶𝗻𝗮, 𝗥𝗔𝗦𝗢𝗔𝗥𝗔𝗛𝗢𝗡𝗔 𝗔𝗻𝗱𝗿𝗶𝗻𝗶𝗮𝗶𝗻𝗮 𝗳𝗶𝘁𝗲𝗻𝗲𝗻𝗮𝗻𝗮 𝘁𝗲𝘁𝘀𝘆 𝗮𝗺𝗶𝗻’𝗻𝘆 𝗔𝗻𝘁𝗲𝗻𝗶𝗺𝗶𝗲𝗿𝗮𝗻-𝗱𝗼𝗵𝗼𝗹𝗼𝗻𝗮
Fanarenana ny orinasa SECREN : Tafiditra tao anaty lahadiniky ny Filan-kevitry ny Governemanta izany. Antony lehibe tsy mampiodina ny orinasa ny olana ara-pitantanana izay mahatonga fiantraikany eo amin’ny ara-bola sy ara-pitaovana. Hojeren’ny rafi-panjakana araka izany ny fandravonana io olana ara-pitantanana io ary koa ny rafitra ara-tsosialy. Tsy ny orinasa SECREN ihany fa ireo orinasa ara-panjakana hafa ihany koa.
Fandaharanasa ODOF (One District One Factory) : Miainga amin’ny famokarana ny sanda fanampiny ny fampandrosoana. Nisy ny fandihadiana teny anivon’ny orinasa ODOF efa napetraka ka namoahana drafitra fanarenana ho fampandehanana azy ireny. Miisa 32 ireo milina eny anivon’izy ireny ary mandeha tsara ankehitriny. Mampiasa olona manodidina ny 400 izy ireo ary miteraka fidiram-bola mitentina 120 hatramin’ny 130 tapitrisa Ariary isan-taona. Misy ny fepetra fanohanana avy amin’ny MIDSP hampandehanana ny orinasa ODOF rehetra amin’ity fanavaozana ity izay hifantohan’ny Minisitera tanteraka. Nisitraka fampiofanana mikasika ny fitantanana ankapobeny sy ny fitantanana ara-bola ireo mpitantana izay namoahana mason-tsivana ahafahan’izy ireo mahazo ny fitantanana ny orinasa nanomboka ny volana lasa teo.
Fametrahana drafitra fanarenana ny orinasa SIRANALA / KAFEMA sy ny orinasam-panjakana hafa : Ny fanatsarana ny tontolon’ny fandraharahana sy ny tontolon’ny fampiasam-bola ahafahan’ireo mpisehatra rehetra miasa am-pitoniana no tsy maintsy mipetraka tsara. Milamina ny fepetra sy ny fenitra rehetra dia milamina avokoa ny ambiny. Izany indrindra no hijerenan’ny rafi-panjakana akaiky ireo drafitra sy fenitra rehetra takiana amin’izany : ny Lalàna mifehy ny fampandrosoana ara-indostrialy izay miandry ny didim-panjakana fampiharana azy ; ny fampiharana ny fifanarahana fandraisana andraikitra ara-indostrialy (pacte de l’industrialisation) eo amin’ny fanjakana sy ny sehatra tsy miankina izay arahin’ny Conseil National pour l’Industrialisation de Madagascar (CNIM) maso ny fanatanterahina azy ; ny fananganana ny Fonds National pour le Développement Industriel (FNDI) izay fitaovana mametraka rafitra ara-bola sy mitondra tohana ny orinasa madinika sy salantsalany. Ny tanjona sy ny lalan-tsaina apetraka mandrakariva moa dia ny hoe famoronana asa ateraky ny sehatra indostrialy.
Fanaovana ny Fikaonan-doha-pirenena ho an’ny fanarenana ara-toekarena : hiarahan’ny MEF sy MIDSP ary ireo mpisehatra amin’ny sehatra tsy miankina mikarakara hijerena vahaolana sy lalan-tsaina iombonana eo amin’ny resaka fifaninanana iraisam-pirenena, ny lafin’ny famokarana tsara kokoa. Ireo fehin-kevitra hivoaka amin’io fikaonan-doha-pirenena io no ho lasa tondro zotra imasoan’ny asa rehetra eto anivon’ny MIDSP.
