𝙉𝙖𝙩𝙤𝙢𝙗𝙤𝙠𝙖 𝙣𝙮 𝙛𝙞𝙫𝙞𝙙𝙞𝙖𝙣𝙖𝙣’𝙣𝙮 𝙊𝙧𝙞𝙣𝙖𝙨𝙖𝙢-𝙥𝙖𝙣𝙟𝙖𝙠𝙖𝙣𝙖 𝙎𝙋𝙈 𝙫𝙖𝙧𝙮 𝙢𝙞𝙫𝙖𝙣𝙩𝙖𝙣𝙖 𝙚𝙣𝙮 𝙖𝙢𝙞𝙣’𝙣𝙮 𝙩𝙖𝙣𝙩𝙨𝙖𝙝𝙖 𝙢𝙥𝙖𝙢𝙤𝙠𝙖𝙩𝙧𝙖 𝙨𝙮 𝙢𝙥𝙖𝙣𝙖𝙣𝙜𝙤𝙢-𝙗𝙤𝙠𝙖𝙩𝙧𝙖
Teny Imerintsiatosika no nisantarana ny fividianan’ny SPM (State Procurement of Madagascar) ny vary akotry eny amin’ny tantsaha sy mpanangom-bokatra, amin’ny vidiny ara-drariny. Vahaolana notanterahan’ny Minisiteran’ny Varotra sy ny Fanjifana (MinCC), araka ny toromariky ny Filohan’ny Fanavaozana ny Repoblikan’i Madagasikara (PRRM), nanoloana ny fitarainan’ireo mpisehatra ireo amin’ny fidinan’ny vidin’ny vary ambany dia ambany eny amin’izy ireo.
Nialohavan’ny Atrikasa nifanakalozan-kevitra notarihin’ny Minisitry ny Varotra sy ny Fanjifana, Haingotiana ANDRIAMADISON, tao amin’ny Espace JEROSALEMA Imerintsiatosika izany. Fihaonana nandrasan’ireo Solombavambahoaka voafidy tao Arivonimamo Pierre Aimé RAKOTONDRABESA, voafidy tao Tsiroanomandidy Harson RAHOLIJAONA sy Lucien RANARIVELO ary ny Solombavambahoakan’i Fenoarivobe Bien Aimé Arsène RANDRIANARISOA anjara. Teo koa ny avy amin’ny Rafitra fampisamboram-bola SECAM ary ny mpanangom-bokatra sy tantsaha mpamokatra avy amin’ny Faritra Itasy sy Bongolava.
« Ny tonga lafatra tsy misy fa ny zava-dehibe dia nahita vahaolana isika androany », hoy ny Minisitra Haingotiana ANDRIAMADISON raha namarana ny Atrikasa.
Nambaran’ny Solombavambahoaka ny fahafaha-pony tamin’ny fihaonana. « Afa-po izahay tamin’ny androany fa ho arahinay maso ny fampiharana », hoy ny Solombavambahoaka Lucien RANARIVELO.
Nantitranterina nandritra ny fifanatrehana fa anatin’ny mangarahara tanteraka no anatanterahana izao vahaolana ho an’ny tantsaha mpamokatra sy mpanangom-bokatra izao.
