14 Oktobra

𝙁𝙖𝙣𝙠𝙖𝙡𝙖𝙯𝙖𝙣𝙖 𝙤𝙛𝙞𝙨𝙞𝙖𝙡𝙮 𝙣𝙮 𝙩𝙨𝙞𝙣𝙜𝙚𝙧𝙞𝙣𝙩𝙖𝙤𝙣𝙖 𝙛𝙖𝙝𝙖-68 𝙣𝙖𝙝𝙖𝙩𝙚𝙧𝙖𝙝𝙖𝙣’𝙣𝙮 𝙍𝙚𝙥𝙤𝙗𝙡𝙞𝙠𝙖 𝙣𝙮 𝙢𝙖𝙩𝙨𝙤 𝙣𝙤𝙩𝙖𝙣𝙩𝙚𝙧𝙖𝙝𝙞𝙣𝙖 𝙩𝙚𝙤 𝙖𝙢𝙞𝙣’𝙣𝙮 𝙎𝙚𝙧𝙖𝙣𝙖𝙢-𝙥𝙞𝙖𝙧𝙖𝙢𝙖𝙣𝙞𝙙𝙞𝙣𝙖 𝙖𝙤 𝘼𝙣𝙩𝙨𝙤𝙝𝙞𝙝𝙮, 𝙣𝙖𝙩𝙧𝙚𝙝𝙞𝙣’𝙣𝙮 𝙁𝙞𝙡𝙤𝙝𝙖𝙣’𝙣𝙮 𝙁𝙖𝙣𝙖𝙫𝙖𝙤𝙯𝙖𝙣𝙖 𝙣𝙮 𝙍𝙚𝙥𝙤𝙗𝙡𝙞𝙠𝙖𝙣’𝙞 𝙈𝙖𝙙𝙖𝙜𝙖𝙨𝙞𝙠𝙖𝙧𝙖 (𝙋𝙍𝙍𝙈) 𝙆𝙤𝙡𝙤𝙣𝙚𝙡𝙮 𝙈𝙞𝙘𝙝𝙖ë𝙡 𝙍𝘼𝙉𝘿𝙍𝙄𝘼𝙉𝙄𝙍𝙄𝙉𝘼 𝙢𝙞𝙫𝙖𝙙𝙮.

Matso nandraisan’ny miaramila sy sivily anjara no ivon’ny fankalazana ny 14 Oktobra tany Antsohihy. Taorian’ny filaharan’ny avy amin’ny Tafika malagasy, Zandarimariam-pirenena, Polisim-pirenena, mpandraharahan’ny Fonja dia nifanjohy nandalo nanoloana ny manampahefana teo amin’ny Seranam-piaramanidin’Ambalabe ireo solontena avy amin’ny Faritra sy fikambanana isan-tsokajiny.

Vahiny manokana nanatrika izany ny Filohan’ny Antenimieram-pirenena any Tchad, Ali Kolotou Tchaïmi. Nanotrona ny lanonana ny Mpanolotsaina avon’ny Fanavaozana mirahalahy, ny Filohan’ny Antenimieram-pirenena ary mpikambana maro ao amin’ny Governemanta ka anisan’izany ny Minisitry ny Varotra sy ny Fanjifana (MinCC) Haingotiana ANDRIAMADISON.

Talohan’izay dia nisy ny fitsidihan’ny Filohan’ny Fanavaozana ny trano fonenan’ny Filoha voalohan’ny Repoblika tao Anahidrano. Teo amin’ny lavarangana fikabarian’ny Filoha Philibert TSIRANANA izy no nanambara tamin’ny vahoakan’Anahidrano fa mbola tsy mahaleotena i Madagasikara. « 𝘕𝘺 𝘦𝘻𝘢𝘬𝘢 𝘪𝘻𝘢𝘺 𝘯𝘢𝘵𝘢𝘰𝘯’𝘯𝘺 𝘍𝘪𝘭𝘰𝘩𝘢 𝘗𝘩𝘪𝘭𝘪𝘣𝘦𝘳𝘵 𝘛𝘚𝘐𝘙𝘈𝘕𝘈𝘕𝘈 𝘯𝘰 𝘩𝘪𝘦𝘻𝘢𝘩𝘢𝘯𝘵𝘴𝘪𝘬𝘢 𝘩𝘰 𝘵𝘰𝘩𝘪𝘻𝘢𝘯𝘢 𝘮𝘣𝘢 𝘩𝘢𝘮𝘱𝘢𝘩𝘢𝘭𝘦𝘰𝘵𝘦𝘯𝘢 𝘵𝘢𝘯𝘵𝘦𝘳𝘢𝘬𝘢 𝘯𝘺 𝘷𝘢𝘩𝘰𝘢𝘬𝘢 𝘮𝘢𝘭𝘢𝘨𝘢𝘴𝘺 », hoy ny Kolonely Michaël RANDRIANIRINA.

Sakafo mita-pihavanana « Velatsihy » tao amin’ny biraon’ny Faritra Sofia no namaranana ny Fankalazàna.