FIAROVANA NY TANTSAHA, ANTOKY NY FAMATSIANA ARA-DRARINY SY TSY TAPAKA.

𝐅𝐀𝐍𝐃𝐑𝐈𝐍𝐃𝐑𝐀𝐍𝐀 𝐍𝐘 𝐅𝐀𝐌𝐀𝐓𝐒𝐈𝐀𝐍𝐀 𝐕𝐀𝐑𝐘 : 𝐇𝐀𝐌𝐀𝐅𝐈𝐒𝐈𝐍𝐀 𝐍𝐘 𝐅𝐄𝐏𝐄𝐓𝐑𝐀 𝐇𝐈𝐀𝐑𝐎𝐕𝐀𝐍𝐀 𝐍𝐘 𝐓𝐀𝐍𝐓𝐒𝐀𝐇𝐀 𝐒𝐘 𝐇𝐈𝐀𝐍𝐓𝐎𝐇𝐀𝐍𝐀 𝐍𝐘 𝐅𝐀𝐌𝐀𝐓𝐒𝐈𝐀𝐍𝐀 𝐍𝐘 𝐓𝐒𝐄𝐍𝐀

Notanterahina tao Ambohidahy, tao amin’ny Minisiteran’ny Varotra sy ny Fanjifana, ny Alatsinainy 10 Aogositra 2026, ny fivoriana niarahan’ireo tomponandraikitra sy teknisianina avy amin’ireo sampan-draharaha voakasika amin’ny fandrindrana ny famatsiana vary eto amin’ny firenena.Nandray anjara tamin’ny dinika ireo solontena avy amin’ny Minisiteran’ny Asa Vaventy, ny Minisiteran’ny Indostria sy ny Fampivelarana ny Sehatra Tsy Miankina, ny Primatiora, ny Minisiteran’ny Fambolena sy ny Fahaleovantena ara-tsakafo, ny INSTAT, ary ny Fitantanana ny hetra, niaraka tamin’ireo ekipa teknika eto anivon’ny Minisiteran’ny Varotra sy ny Fanjifana.

Notarihin-dRamatoa Minisitry ny Varotra sy ny Fanjifana, Haingotiana ANDRIAMADISON, ny dinika, izay nifantoka indrindra tamin’ny fandrindrana ny famatsiana vary sy ny fepetra ara-barotra mifandraika amin’izany.

Ny tanjona dia ny hahafahana mampifanaraka ny famatsiana amin’ny tena filàn’ny tsena, sady miaro ny famokarana eto an-toerana sy ny tombontsoan’ny tantsaha.

Nohamafisina manokana ny filàna fiaraha-miasa akaiky sy fifampizarana antontan’isa iombonana ary azo itokisana eo amin’ireo sampan-draharaha voakasika, indrindra mahakasika ny filàna vary eto amin’ny firenena sy ny famokarana eto an-toerana. Ireo antontan’isa ireo no hanamora ny fandraisana fanapahan-kevitra mifototra amin’ny zava-misy, mifanaraka amin’ny toe-draharaha sy ny vanim-potoana, ary ahafahana mandrindra ara-potoana ny fepetra ara-barotra ilaina.